انه في يوم العاشر من ديسمبر سنة الفان و عشرة
حدث شئ عجيب غريب مريب
قررت انا اذ فجأة
ان :
ادخل المطبخ اعمل عشا !!
انا كنت قاعدة في حالي ماسكة كتاب الفسيولوجي بتاع مجدي صبري بتاع ال سي ان اس
و فجأة حسيت بالملل
و قولت يا بت ما تهربي من المذاكرة
و طبعا بما ان الفرجة علي التليفزيون و القاعدة علي الكمبيوتر عليهم حراسة مشددة فمفيش غير حاجة واحدة بس هي اللي هتخليني اهرب من المذاكرة
ألا و هي : المطبخ
قولت هخش اسلق بيض
و يا ريتها كانت سلق بيض
لااااااااااا
ده انا اعدت افكر
ليت الشباب يعووووود يوما
و اعدت اتحسر علي ايام الاجازة اللي كنت بدخل فيها المطبخ و اعمل فيها كيكات و تورت و بيتزات
اي و الله
هيييييييييييييييه دنيا
ياما اهلي اتبهدلوا معايا كتير
و يقولوا معلش و نصبر و مسيرها تتعلم
و انا ما بتعلمش
و حتي لو في يوم مثلا عملت حاجة حلوة ,, الفرن يحرقها
اي و الله الفرن مستقصدني
اعدت اتحسر علي ايام الماضي و جياااحه
و بعدين قولت في عقلي
ايناس : يلا يا ايناس نرجع اللي فات
ايناس : و ماله يلا نرجعه و فيها ايه يا اختشي
روحت جبت وصفة كنت جيباها من فتكات حبيب قلبي
اسمها : كيكة النسكافية بالبندق
اتكلت علي ربنا و جهزت نفسي و روحت قولت لماما بكل عزم
ماما انا قررت قرار ختشير
انا قررت اعمل كيكة
ماما : ــــــــــ
و روحت دخلت المطبخ
و دار هذا الحوار بيني و بين مامتي - انا في المبطخ و هي في الصالة -
انا : ماماااااااااااااا عندنا زبدة ؟
ماما : ايوة
انا : فيييييييييييييين ؟
ماما : في الفريزر
انا : مامااااااااااااااا عندنا سكر بودرة ؟
ماما : اه
انا : فين ؟
ماما : في باب الثلاجة
انا : ماما فين الـ
ماما : الدقيق في درج المطبخ اللي جنب الثلاجة و مضرب البيض في الدرفة اللي تحت
و البيض في درج البيض في التلاجة
و اللبن في الرف التاني من التلاجة
اول ما هتفتحي التلاجة هيقولك انا اهو يا اينااااااااااااااااااس
و هكذا بدأت المعركة بيني و بين كيك النسكافية
جبت طبق العجن و لسه بسمي الله
و بقول يا هادي و هبدأ
بنت أختي دخلت عليا المطبخ
زوزا : خالتشوووو ,, انتي بتعملي ايه ؟
انا : بعمل كيك يا حبيبتي
زوزا : طيب عاوزة اعد فوق –قصدها علي رخامة المطبخ-
انا : زوزا ما ينفعش يا حبيبتي
طبعا بما انها طفلة من اطفال الجيل الجديد عمرها ما هتقبل رفضي لقيتها فجأة
عملت زي البت سمارا في اخر ذا رينج تو و تسلقت ادراج المطبخ و لقيتها قاعدة علي الرخامة في لحظة دهشة
و في عقل بالها : لكشي تولعي يا بعيدة
انا : يا شيخة مش كنتي تقولي انك عاوزة تطلعي علي الرخامة
و بدأت المهام الصعبة
اولا حاجة ضرب الزبدة
طبعا الزبدة في الفريزر فماسكه نفسها بطريقة
اول ما شغلت مضرب البيض فيها راح عامل زي صوت خراطة الأسمنت
تششششششششششششششش
انتفضت و فصلته
و بعدين جربت تاني بالراحة
بس المرة دي استعصيت عليه و صممت احفر في الزبدة
و اذا بالزبدة تتطاير في الهواء الطلق و تتبعثر في شتي انحاء المطبخ
و صوت المضرب يزداد علوا حتي ظنته اختي الصغيرة صوت طائرة و اخذت تصيح :
طيااااااااارة طيااااااارة
هنا أدركت خطورة الموقف
و صحت في الزبدة :
يا شيخة انضربي بقي , ضربه في مصارينك
و اطفئت مضرب البيض قبل ان يحترق الماتور
و اخذت الملم في قطع الزبدة المبعثرة قبل ان تدخل أمي المطبخ و تصاب بسكتة قلبية اثر رؤية هذا المشهد
و انتظرت حتي هدأ ماتور مضرب البيض
ثم اخذت في الضرب في الزبدة من جديد
بس المرة دي بحنية
بعد شوط من العذاب المرير في ضرب الزبدة
أضفت سكر البودرة
بس تعملوا ايه المنحوس منحوس ,,,
بعد ما ضفتها اكتشفت ان السكر متجمع و عامل كور صغنونة كده
و بالتالي لازم يتضرب بأمانة و ضمير
استغرق ضرب السكر مدة لا بأس بها من الوقت
و بعد ذلك أضفت البيض
و انا عمالة اضرب
و اضرب
و اضرب
تذكرت مشهد كنت قد رأيته في احدي البرامج المطبخية
ان الشيف قلب الطبق و وجهه ناحيته
و اعد يضرب
فانبعثت في نفسي الغيرة
و حدثني عقلي الباطن : طيب و انا اقل منه في ايه
و شرعت في ان اميل الطبق ناحيتي
و ما ان املته ناحيتي
حتي حدث ما لم يكن في الحسباااان
أن أن أأأأأأأأأأأأأأأأأأأأأن
لن اتحدث عن هذا الجزء لأني بسببه اضطررت ان استحم و هو في اعتقادي شئ يعاقب عليه القانون هذه الأيام
و لأن همتي عالية و طموحي فوق الوصف لم اتوقف
و استمريت في الضرب و العجن
و استمرت بنت اختي الجالسة بجوار الطبق في سؤالي :
خالتشو انتي بتعملي ايه ؟
و كل مرة برد نفس الاجابة : بعمل كيك يا زهرة
تمر دقيقة
خالتشوو انتي بتعملي ايه ؟
و علي هذا المنوال طول مدة العجن
ثم شرعنا انا و هي نغني أغنية ظلموه هذا العصر و هي
"شربت حجرين ع الشيشة"
هي تردد الجزأ الخاص بـ : اه ياني ياني
و انا اردد : مش هعمل كده تاني
حتي وجدنا من يدق جرس الباب
ففتحت لأجدها ياسمين جارتي تسألني :
هي دي خطوبة مين ؟
بعد ان اقنعت المسكينة انها ليست خطوبة و اني فقط اعد العشاء صعدت و علي وجهها علامات الذهول
و رجعت انا الي كيكتي
بعد العجن فكرت في ان اجعل الكيكة متكلفة
انا : ماماااااااااااااااااااااا عندنا مكسرات
ماما : ليــــــــــــــه ؟
هنا خرجت أمي عن صمتها و قررت ألا تضحي بمكسراتها
و اخذت في حسبانها : عض قلبي و لا تعض مكسراتي
انا : لا ابدا هحط في الكيك مكسرات
ماما : ــــــــــــــــــــــــــــــــــــــــ ـ
لن اتحدث كثيرا عن رد أمي حتي لا تحذفه الرقابة
و لكني بطريقة ما توصلت الي مكان المكسرات السري
و من ثم اخذت كمية لا بأس بها من البندق و اللوز و عين الجمل
و وضعتهم في الهون
و اخذت افرمهم
طن طن طن
و اخذت في ترديد :
اسمعععع كلااام أمك
و ما تسمعش كلاام ابوووك
و قطع علي خلوتي جرس الباب مرة اخري
فوجدتها هذه المرة نهي جارتي الأخري
تسألني في فرحة :
هو ده سبوع مين ؟
و المسكينة اصابت بالذهول الشديد جراء شرحي لها انني مجرد اعد العشاء
و انتهت الكارثة و انهيت العجينة و صببتها في صينية و ادخلتها الفرن و ضبطت تايمر الوقت حتي اتناصح علي الفرن و لا يتسبب في حرق اي جزء من اجزاء الكيك , فهو العدو اللدود الذي يتسبب في حرق كل حلوياتي
و ليس انني اسرح امام التلفاز مثلا
الخسائر :
هدومي مليانة عجينة
أرضية المطبخ واقع عليها عجينة
حيطان المطبخ واقع عليها عجينة
رخامة المطبخ واقع عليها عجينة
وجه بنت اختي مليان دقيق و عجينة
أصلنا كنا بنلعب بالدقيق قبل ما نحطه
حوض المطبخ مليان لحد اخره ملاعق و اطباق
و النتيجة :
كيك نسكافية بالبندق و اللوز و عين الجمل
و كل عشوة و انتو طيبين
الأربعاء مايو 28, 2014 6:15 am من طرف شريم الزهراني
موضوع: مذكرات طالبة طب 
