قصيدة انا مصرى

انا مصـــــــرى

انا مصرى من ساسى لـ راسى
خوفو وخفرع حراسى
الشقيانين هما جدودى
...والفلاحين اهلى وناسى
أرض الوطن هى حدودى
فيها لأخر انفاسى
مع انى غرقان ف همومها
والفقر فيها على مقاسى
والضحكه غرقانه ف نومها
وقدرنا بقى صعب وقاسى
وكتير من الويل بسألها
ماكونش انا مت وناسى!!؟
يابلادى ردى وجوبينى
هتسيبى عقلى لوسواسى
يقوم سؤالى يضحكها
والضحكه تجرح احساسى
وتقولى انا ملك لغيرك
والختم ف العقد رئاسى
يابلادى بس كدا كفايه
غلطان وحقك على راسى
انا كنت جاهل دى حكايه
وف مخى جزمتى ومداسى
لأنى من ساسى لـ راسى